04.04.2014
Tha molaidhean a thaobh leigeil mu sgaoil nas tràithe de sheòrsaichean àraid de phrìosanaich air a thighinn fo sgrùdadh aig Comataidh a’ Cheartais agus iad a’ sireadh fianais ann an aithisg a chaidh fhoillseachadh an-diugh.
Mar phàirt de dh’atharrachaidhean Ìre 2 de Bhile Ceartas Eucoireach (Alba), tha Riaghaltas na h-Alba a’ moladh gun tèid stad a chur air leigeil mu sgaoil tràth sa bhad a thaobh eucoirich-feise a fhuair binn ceithir bliadhna no barrachd, agus feadhainn chunnartach eile a fhuair binn deich bliadhna no barrachd.
Cha bhiodh buaidh sam bith aig seo air eucoirich eile aig an ìre seo agus bhiodh an t-siostam ùr a’ buintinn a-mhàin ri eucoirich iomchaidh an dèidh do na h-atharrachaidhean a bhith air an cur an gnìomh.
Nì Comataidh a’ Cheartais sgrùdadh air Ìre 2 de Bhile Ceartas Eucoireach (Alba) aig deireadh a’ Ghiblein agus tha iad ag iarraidh bheachdan air na h-atharrachaidhean a thathar a’ moladh.
Thuirt Neach-gairm na Comataidh, Cairistìona Ghreumach BPA:
“Tuigseach ’s gu bheil sinn a thaobh rùn Riaghaltas na h-Alba an cunnart don phoblach a lughdachadh le bhith a’ cur stad air leigeil mu sgaoil tràth sa bhad do chuid de dh’eucoirich, a dh’fhaodadh a bhith air dà thrian den bhinn aca a dhèanamh, tha sinn ag iarraidh faighinn a-mach carson a bhiodh cuid de dh’eucoirich a’ tighinn fon t-siostam ùr ’s nach biodh cuid eile.
“Tha sinn airson cluinntinn o luchd-obrach sòisealta ann an raon ceartas eucoireach, riochdairean o Bhritheamhan a’ Chrùin agus bhuidhnean airson ath-leasachadh peanasachaidh agus còraichean luchd-fulaing eucoir, Seirbheis Phrìosain na h-Alba, Bòrd Paròil/Saorsa na h-Alba, cho math ri luchd-acadeimigeach iomchaidh agus daoine sa mhòr-shluagh mu na beachdan aca air a’ cheist chudromach seo a thaobh sàbhailteachd a’ mhòr-shluaigh.”
Faodar ceangal ris an iarrtas-fianais, a tha fosgailte gu ruige 6 Cèitean, a ruigheachd gu h-ìseal:
http://www.pàrliamaidnahalba.ra/gnothachpàrliameadach/Comataidheanandràsta/65347.aspx
Cùl-fhiosrachadh
Faodar ceangal ri litir o Rùnaire a’ Chaibineit airson Ceartais gu Neach-gairm Comataidh a’ Cheartais a chuireas an cèill cùl-sgeul rùn Riaghaltas na h-Alba a thaobh an t-siostam far an tèid seòrsaichean àraid de phrìosanaich a leigeil mu sgaoil tràth sa bhad a ruigheachd an seo:
http://www.pàrliamaidnahalba.ra/gnothachpàrliameadach/Comataidheanandràsta/65347.aspx
Contact information
Media information
Public information
- Telephone enquiry line: 0800 092 7500 or 0131 348 5395 (Gàidhlig)
- info@parliament.scot
- Text 07786 209 888
- Ask a question online through live chat
- We also welcome calls using the Text Relay service or in British Sign Language through contactSCOTLAND-BSL
Keep up to date with us on: