Rannsachadh air na tha an dàn do dh’Alba gu h-eaconamach a’ dol a dh’Obar Dheathain

Cumaidh a’ Chomataidh coinneamh oifigeil ann an Leabharlann Sir Donnchadh Rice ann an Oilthigh Obar Dheathain air Diluain 28 Giblean, far an èist iad ris na fianaisean a leanas: Mike Tholen, Ola is Gas na RA; An t-Oll. Alex Kemp, Oilthigh Obar Dheathain agus Penelope Warne, Ceannard Lùths, CMS Cameron McKenna.

Thuirt Neach-gairm na Comataidh, Murchadh Frìseal BPA:

“Thuige seo tha an rannsachadh air fianais fhaotainn o ghrunn dhaoine aig àrd-ìre ann an gnìomhachas, ’s o luchd-poilitigs is luchd-acadeimigeach mu phrìomh cheistean leithid airgead, cìsean is fiachan.

“Tha fios aig a h-uile duine gu bheil ola ’s gas cudromach a thaobh fastaidheachd agus saidhbhreas airgid. Ach tha gu bheil a’ Chomataidh a’ coinneachadh ann an Obar Dheathain a’ sealltainn dè cho cudromach is a tha an gnìomhachas seo a thaobh na tha an dàn do dh’Alba gu h-eaconamach.”

Thuirt Leas-neach-gairm na Comataidh, Dennis Robastan BPA:

“Tha ola ’s gas cudromach chan ann a-mhàin dhaibhsan a dh’fhuiricheas is a dh’obraicheas ann an Obar Dheathain agus san t-Siorrachd, ach do na tha an dàn a thaobh airgid is eaconamaidh na h-Alba gu h-iomlan. Chaidh grunn rannsachaidhean fhoillseachadh o chionn ghoirid mu na tha air fhàgail de dh’ola ’s de ghas sa Chuan a Tuath.

“Tha ar Comataidh glè thoilichte a bhith a’ coinneachadh ann an Obar Dheathain, far am biomaid an dòchas ar tuigse a chur am feabhas a thaobh mar a chuireas an gnìomhachas ri cor na h-Alba an dèidh 2014.”

Cùl-sgeul

Tha na pàipearan a bhuineas ri coinneamhan na Comataidh ri fhaotainn an seo. Bidh a’ choinneamh a’ tòiseachadh aig 13.40 ’s a’ tighinn gu crìch mu 15.30.

Thathar a’ brosnachadh a’ mhòr-shluaigh a’ choinneamh seo a fhrithealadh agus gheibhear cothrom air ticeadan a chur mu seach tro bhith a’ dol an conaltradh ri Alexia Forrester air 0131 348 5403 or alexia.forrester@scottish.parliament.uk